689688086  academiaaranesalenguaoccitana@gmail.com

Amassada der IEA-AALO damb eth Congrès Permanent de la Lenga Occitana

Congrés Permanent

Eth dia 18 de març se realizèc ua amassada entre representants deth Congrès Permanent de la Lenga Occitana e er Institut d’Estudis Aranesi-acadèmia aranesa dera lengua occitana. Es representants deth Congrès Permanent èren eth sòn President Gilabèrt Mercadièr, eth Conselhèr Regional Guilhèm Latrubesse e es senhors Cedric Valmary e Nicolau Rei Bèthvéder. Per part der Institut d’Estudis Aranesi-acadèmia aranesa dera lengua occitana i participèren Jusèp Loís Sans, coma President, Angelina Cases en qualitat de Vicepresidenta e eth Sr. Jèp de Montoya, membre der IEA-AALO, que i participaue, tanben, en qualitat de Cap de Politica Lingüistica deth Conselh Generau d’Aran.

Dempús de saludar ath Sindic d’Aran es dues delegacions realizèren ua amassada de trebalh ena que poderen intercambiar es sòns coneishements e es sòns punts d’enguarda. Es membres der IEA-AALO aueren era oportunitat de conéisher de prumèra man es aportacions que hè eth Congrès Permanent de la Lenga Occitana, qu’amasse mès de 40 lingüistes prestigiosi e qu’a artenhut a digitalizar diuèrses òbres imprescindibles dera lengua occitana e de meter-les en hilat d’internet de tal manèra qu’era sua consulta se hè imprescindibla entà un trebalh seriós en matèria de lengua e que la convertís en ua institucion referenta en Occitània.
Eth Congrès Permanent de la Lenga Occitana ei ua institucion damb fòrça supòrts administratius e de diuèrses organizacions occitanes e occitanistes, que comencèc eth sòn caminar en 2008. Ena sua estructuracion iniciau i participèc er Institut d’Estudis Aranesi, abans d’èster Acadèmia aranesa dera lengua occitana, e eth prumèr president des estructures anteriores ath Congrès Permanent dera lengua occitana, en siguec eth Sr. Jèp de Montoya.
Eth Congrès Permanent e er IEA-AALO an iniciat damb aguesta amassada un camin de relacions que necessariament a d’èster positiu. Es dues institucions se reconeishen mutuauments que compartissen es madeishi principis lingüistics sus era unitat dera lengua e es bases lingüistiques.

IMG-20150318-WA0000