689688086  academiaaranesalenguaoccitana@gmail.com

Es Collègis d’Avocats de Catalonha impulsaràn er emplec der aranés ena justicia

IMG 0529

Vielha, 23 de juriòl de 2018.- Es Collègis d’Avocats de Catalonha a trauès dera sua Comission de Lengua impulsaràn e fomentaràn er emplec der aranés en àmbit dera justícia. Aguesta ei era principau conclusion ena qu’arribèren eth diuendres es integrants dera Comission de Lengua des Illustres Collègis d’Avocats de Catalonha pendent era reünion que mantengueren ena sedença der Institut d’Estudis Aranesi-Academia aranesa dera lengua occitana en Vielha.

Era amassada, avalorada fòrça positivaments pes assistents, compdèc damb era preséncia deth vicesindic d’Aran Luís Carlos Medina, eth president dera Comission de Lengua des Illustres Collègis d’Avocats de Catalonha, Joan Riera, e eth president der IEA-AALO, Jusèp Loís Sans, ath delà de desparièrs representants d’ambdues institucions.

Ath finalizar era reünion, Joan Riera expliquèc que s’adoptaràn mesures entà fomentar er emplec der aranés enes jutjats de Vielha dempús de verificar eth pòc emplec que se hè, pr’amor qu’era lengua que predomine ei era castelhana. Riera anoncièc qu’impulsaràn iniciatiues coma era collocacion de pannèus en jutjat entà que es usatgèrs dera justícia en Aran sàpien que se pòden dirigir en aranés ara Justícia. Autes mesures seràn, elaborar un pack de benvenguda as jutges damb destinacion en Vielha entà que coneishen era realitat diferenciada dera Val d’Aran e era existéncia d’ua pròpia lengua, qu’ei cooficiala en Catalonha, atau coma estudiar includir er aranés, coma s’a hèt damb era lengua catalana, laguens deth plan de promocion deth catalan entre es letradi deth torn d’ofici, qu’arreceben ua compensacion economica se hèn es escrits en catalan. Aguest projècte demorèc interromput damb era aplicacion der article 155 dera Constitucion. Fin finau, Riera tanben didec qu’era Comission de Lengua arrevirarà es formularis basics der àmbit juridic e se dirigirà as avocats e avocades d’Aran entà mostrar-les er interès per emplec der aranés e animar-les a utilizà’c en sòn trabalh jornalièr.

Pera sua part, Jusèp Loís Sans, avalorèc fòrça positivaments es iniciatiues prepausades pendent era amassada pr’amor que didec qu’eth papèr dera Academia ei justaments eth de hèr reflexionar sus aquerò que se pòt hèr en desparièrs àmbits, coma en aguest cas eth dera justícia. Sans prepausèc qu’era Comission de Lengua des Illustres Collègis d’Avocats de Catalonha s’amasse un còp ar an ena Val d’Aran justaments entà poder hèr eth seguiment der emplec der aranés en àmbit judiciau.

Ena reünion tanben s’analisèc era senténcia deth TC 11/2018 de 8 de hereuèr de 2018 sus eth recors d’inconstitucionalitat 4460-2011 interpausat per president deth Govèrn Espanhòu en relacion damb diuèrsi precèptes dera Lei deth Parlament de Catalonha 35/2010 de 1 d’octobre, sus er emplec preferent der occitan, aranés en Aran, per considerar qu’eth tèrme “preferent” pretenie autrejar-li ar aranés un estatus juridic superior ath catalan o ath castelhan, en cambi çò que pretenie ère deféner e protegir er emplec der occitan, aranés en Aran.