689688086  academiaaranesalenguaoccitana@gmail.com

Era Acadèmia presente es sues produccions ath Sindic d’Aran

IMG 20190102 WA0005

Es Membres deth Conselh Permanent dera Acadèmia an presentat, eth dia 2 de gèr, es produccions dera Acadèmia de 2018 ath Sindic d’Aran, qu’anaue acompanhada dera Conselhèra Anna Diaz. S’an presentat es publicacions:

1.- Es Vèrbs en aranés
2.- Vocabulari des espòrts d’iuèrn
3.- Vocabulari ortografic der aranés
4.- Vocabulari fonetic basic der aranés
5.- Inici dera colleccion Antòni Nogues damb Anna Karenina (podetz trobar-ne mès informacion ena Web), damb publicacion digitau mensuau dera traduccion ar aranés d’ua òbra dera literatura internacionau.
6.- Presentacion deth brolhon deth Diccionari aranés, damb un procés de correccion finau collectiva, entara sua publicacion definitiva en 2019.
7.- Presentacion des “Principis Gramaticals de l’occitan” aprovats pera Acadèmia aranesa dera lengua occitana en Plen deth 7 de juriòl de 2018. Era publicacion definitiva dera òbra ei pendenta dera consecucion dera autorizacion de qui a drets d’autor en ua cèrta part. Peth moment se’n hè ua difusion fòrça restringida entre es responsables politics que dan supòrt ara Acadèmia e persones destacades.

Tanben s’a presentat era Agenda 2019 e eth trabalh de reivindicacion hèt:

1.- Qu’eth mes de Seteme auessem ua compareishença en un intergrop deth Parlament Europèu entà denonciar era actuacion deth Govèrn Espanhòu damb era lengua occitana.
2.- Qu’eth dia 12 de deseme siguessem recebuts pes expèrts deth Conselh d’Euròpa entà contrastar es incompliments der Estat Espanhòu dera Carta Europèa des Lengües Regionaus o Minoritàries. Anteriorament era Acadèmia auie presentat un contrainforme ar Informe der estat Espanhòu
3.- Que s’age admés a tramit en Parlament Europèu ua denóncia contra er Estat Espanhòu pera sua inactivitat damb era lengua occitana, çò que representarà un procés d’intertlocucion en Euròpa damb er Estat Espanhòu sus era sua despreocupacion pera lengua occitana.