689688086  academiaaranesalenguaoccitana@gmail.com

PRESENTACION DES PUBLICACIONS ATH CONSELH GENERAU D’ARAN

IMG 5130

Eth passat dijaus 18 de gèr de 2018  er IEA-Acadèmia aranesa dera lengua occitana, enes persones de Jusèp Loís Sans, coma President, Ròsa Maria Salgueiro, coma Secretària e Jèp de Montoya coma President dera Seccion aranesa presentèren ath Conselh Generau d’Aran quate naues òbres publicades pendent er an 2017.

Se tracte deth “Vocabulari basic der aranés”, eth “Vocabulari dera tecnología dera informacion”, e de dues òbres qu’apartien ara naua colleccion Modèls de Lengua: “Sang Nòble e Sang deth Pòble”, de Jusèp Condò; e “Eth mercadèr de Venècia”, de William Shakespeare, arrevirada per Antoni Nogués.
Pendent era presentacion eth sindic d’Aran, Carlos Barrera, destaquèc eth prètzhèt dera Academia aranesa dera lengua occitana ara ora de trabalhar pera lengua, pr’amor qu’eth motiu d’èster d’un país coma eth nòste, didec, son era cultura, era lengua e era identitat aranesa.

Eth president der IEA-Academia aranesa dera lengua occitana, Jusèp Loís Sans destaquèc qu’aguesti trabalhs son eth resultat de moltes collaboracions e d’ua collegiacion que da as òbres ua valor de referéncia e de testimoni de país. Eth President expliquèc qu’era naua colleccion Modèls de Lengua, nèish damb era volontat de crear modèls de tèxtes, pr’amor qu’ua lengua petita coma er aranés a ua tendéncia facila a presentar un solet model unic de lengua que se reprodusis excessivament enes diuèrsi encastres dera vida, escòla, administracion, literatura,…

Eth president dera Academia, hec referéncia a qu’era publicacion des dus vocabularis de normatius, arrespon ath compromís der IEA-AALO e eth Conselh Generau d’Aran d’elaborar eth diccionari escolar dera lengua, que seguraments serà finalizat en dus ans, e qu’aguestes dues òbres son un auanç deth madeish. Eth Vocabulari basic a mès de 2.500 entrades e 1000 toponims. Eth vocabulari dera Tecnologia presente  mès de 1.500 entrades. Entre es dus signifiquen eth conjunt lexicau aranés mès important existent en aguesti moments.