skip to Main Content
(+34) 973920421 (+34)660170951 secretaria@institutestudisaranesi.cat

Reconeishença der Institut d’Estudis Aranesi coma acadèmia e autoritat lingüistica der occitan, aranés en Aran

Er acte, realizat ena sedença deth Conselh Generau d’Aran, eth 2 d’abriu de 2014, siguec presidit peth sindic d’Aran, Carlos Barrera, e compdèc damb era preséncia deth conseller de Cultura dera Generalitat de Catalonha, Ferran Mascarell, e deth conseller de Justícia dera Generalitat de Catalunya, Germà Gordó. Ar acte tanben assistiren era directora generau de Politica Lingüistica deth govèrn catalan, Ester Franquesa, eth cap de Politica Lingüistica d’Aran, Jusèp Loís Sans, atau coma conselhèrs deth Conselh Generau d’Aran, bailes d’Aran, eth cap de Cultura e Patrimòni d’Aran e membres der IEA.

Eth passat mes de gèr eth Govèrn dera Generalitat de Catalunya, talament coma preve era Lei der Occitan, aranés en Aran, der an 2010, aprovèc eth decrèt qu’autrege ar Institut d’Estudis Aranesi (IEA) eth caractèr d’Academia e d’autoritat lingüistica der occitan.

Damb era aprobacion deth decrèt, er Institut d’Estudis Aranesi se convertic en prumèr organisme der occitan qu’a reng academic. Atau madeish, eth decrèt investís ar Institut coma autoritat entar assessorament en Catalunya en matèria dera lengua pròpia d’Aran, entàs administracions publiques e es organismes que ne depenen, entàs centres d’Ensenhament public e privat e entàs mejans de comunicacion de titolaritat publica.

En paraules deth sindic d’Aran, Carlos Barrera “damb era aprovacion deth Decret 12/2014 de 21 de gèr peth quau s’autrege ar Institut d’Estudis Aranesi eth caractèr d’Academia e d’autoritat lingúistica der occitan, aranés en Aran, lengua pròpia en Aran e oficiau en Catalunya, s’artenh eth mès naut reconeishement entara nòsta lengua e possibilite ara Acadèmia, creada per volentat deth Govèrn dera Generalitat de Catalunya e eth Conselh Generau d’Aran, era pervivéncia dera nòsta lengua, er aranés”

.

Back To Top