Er Institut d’Estudis Aranesi participe enes actes commemoratius dera Diada de Catalonha
Eth president der Institut d’Estudis Aranesi – Acadèmia Aranesa dera Lengua Occitana, Miquèu Segalàs, participèc, er 11 de seteme, enes actes commemoratius dera Diada Nacionau de Catalonha organizadi per l’Institut d’Estudis Catalans (IEC).
En marc d’aguesta jornada, Miquèu Segalàs mantenguec ua amassada damb era presidenta der Institut d’Estudis Catalans, Teresa Cabré, damb qui compartic impressions sus es trabalhs des dues institucions e sus es possibles vies de collaboracion entre es dues acadèmies.
Aguesta trobada siguec ua oportunitat entà refermar es ligams institucionaus entre er Institut d’Estudis Aranesi – Acadèmia Aranesa dera Lengua Occitana e er Institut d’Estudis Catalans, e entà dar valor ath trabalh qu’amien a tèrme es dues institucions en encastre dera lengua e dera cultura.
Pera tarde, eth president dera Acadèmia siguec convidat e assistic ar acte commemoratiu dera Diada de Catalonha presidit per Salvador Illa, president dera Generalitat de Catalonha, que se celebrèc ath Teatre Nacionau de Catalonha.
Aguestes activitats s’emmarquen enes relacions institucionaus qu’er Institut d’Estudis Aranesi – Acadèmia Aranesa dera Lengua Occitana mantenen damb es diuèrses institucions academiques e culturaus de Catalonha.
