Era Acadèmia e Aran pera Natura exploren naues vies de collaboracion

Er Institut d’Estudis Aranesi – Acadèmia Aranesa dera Lengua Occitana, mantenguec eth passat 15 de seteme ua amassada damb Aran pera Natura entà conéisher eth trabalh que desvolope aguesta entitat e explorar possibles vies de collaboracion entre es dues institucions.

En cors dera trobada, eth president der Institut d’Estudis Aranesi – Acadèmia Aranesa dera Lengua Occitana, Miquèu Segalàs, presentèc es objectius, es foncions e es diuèrsi encastres de trabalh dera Acadèmia, atau coma era sua responsabilitat en estudi e era normalizacion dera lengua occitana ena sua varietat aranesa.

Pera sua part, es representants d’Aran pera Natura, expliquèren eth trabalh que desvolopen en sector deth coneishement, era proteccion e era divulgacion deth patrimòni naturau dera Val d’Aran, e compartiren es principaus projèctes e linhes d’accion dera entitat.

Era amassada permetèc compartir perspectives e identificar diuèrsi punts d’interès comun entre es dues entitats, atau coma manifestar era volontat de collaborar en futur, especiaument en camp dera investigacion e era documentacion deth patrimòni naturau d’Aran, damb era lengua occitana coma esturment de coneishement e de transmission d’aguest patrimòni.

En aguesta trobada i participèren Cristina Madruga, presidenta d’Aran pera Natura; Eduardo Martínez, tresorèr; Anna Sala, vocau; Inés Piazuelo, coordinadora e sòcia; Alberto Ginés, tecnic e sòci; Sara Arjó, sòcia dera entitat e Alidé Sans e Miquèu Segalàs, gerenta e president dera Acadèmia respectivament.

Era Acadèmia considère qu’aguest tipe de collaboracions entre institucions e entitats deth territòri son fondamentaus entà impulsar eth coneishement e era valorizacion deth patrimòni naturau, culturau e lingüistic d’Aran.