Er Institut d’Estudis Aranesi clausure eth 12au cors academic

Er Institut d’Estudis Aranesi clausure eth 12au cors academic damb un balanç marcat peth creishement institucionau e era projeccion exteriora

Er Institut d’Estudis Aranesi – Acadèmia Aranesa dera Lengua Occitana (IEA-AALO) celebrèc era clausura deth sòn 12au cors academic en un acte que servís entà hèr balanç d’un an fòrça relevant entath desvolopament, era consolidacion e era projeccion dera institucion. Er Sr. Jordi Suils, delegat de Politica Lingüistica der Alt Pirineu e Aran, assistic ar acte en nòm deth Molt Honorable President dera Generalitat de Catalonha, Sr. Salvador Illa.

Er acte siguec daurit peth president der IEA-AALO, Jèp de Montoya, que balhèc era benvenguda as assistents, arregraïc eth supòrt institucionau e personau recebut ath long deth cors e presentèc es principaus linhes de trabalh dera Acadèmia. Ena sua intervencion, Montoya destaquèc d’ua manèra especiau era dubertura dera naua sedença der IEA en Barcelona, un pas clau entà refortir era preséncia der aranés e der occitan en encastre academic e culturau deth país, e tanben entà enfortir es relacions damb d’autes institucions.

Pendent era session se presentèren es principaus projèctes desvolopadi ath long deth 2025, damb intervencions de diuèrsi membres dera Acadèmia. Miquèu Segalàs expausèc er estat e era evolucion de diuèrses linhes estrategiques de trabalh, entre es quaus destaquen era normativa der aranés, era ampliacion deth diccionari, eth desvolopament der occitan estandard e eth Diccionari der Occitan Aranés (DOA) en linha, en tot destacar de manèra especiau eth nau format en aplicacion mobila, que facilite er accès ath lexic normatiu e amplie er encastre sociau d’aguesta aisina de referéncia.

Per ua auta part, Ròsa Maria Salgueiro presentèc es nauetats enes Colleccions dera Acadèmia e expausèc er estat deth projècte de Toponimia Menora, damb trabalhs de investigacions enes municipis de Bausen e Naut Aran. Tot seguit, Angelina Cases presentèc eth projècte deth Recuelh de Memòria Orau, qu’incorpòre materiaus audiovisuals e met en valor eth patrimòni immateriau e era transmission intergeneracionau dera lengua e informèc der auançament ena digitalitzacion dera Biblioteca dera ‘Scolo deras Pirineos. Dempús, Jusèp Loís Sans parlèc der anàlisis deth Corpus dera Lengua e dera Pireneido e deth sòn estat.

Er acte compdèc tanben damb ua intervencion de Jèp de Montoya dedicada ara Istòria d’Aran, en tot refortir eth ligam entre lengua, territòri e identitat. Un trabalh de gran valor scientific e patrimoniau.

Un des moments mès destacadi dera clausura siguec eth liurament deths Prèmis Literaris Mn. Amiell dera Fundacion Ager, qu’arreconeishen era creacion literària e contribuïssen a fomentar er emplec e eth prestigi dera lengua occitana e dera sua varianta aranesa.

Er acte se barrèc damb ua naua intervencion deth president Jèp de Montoya, que s’acomiadèc deth cors en tot traçar es principaus linhes de trabalh entath futur, en tot avançar proplèus publicacions e projèctes e en tot reafirmar eth compromís der IEA-AALO damb era investigacion, era normativa e era difusion dera lengua. Era jornada acabèc damb ua còpa de cava, que permetèc as assistents compartir impressions e celebrar collectivament era fin d’un cors fòrça significatiu entara Acadèmia.