Inauguracion dera 2au Escòla Aranesa d’Idrologia deth Carst

Eth passat deluns 30 de junh, era Acadèmia, acuelhec era inauguracion dera 2au Escòla Aranesa d’Idrologia deth Carst. Er acte compdèc damb era intervencion d’ Àlex Barés, director generau de Baqueira/Beret; Jèp de Montoya, president der Institut d’Estudis Aranesi – Acadèmia Aranesa dera Lengua Occitana, e Antoni Freixes, president dera Societat Catalana d’Idrologia e Carst. A continuacion se prononcièren diuèrses ponéncies, que tractèren tematiques diuèrses, coma era tectonica de plaques, era morfologia glaciau, fluviau e carstica ar exemple des Uelhs deth Joèu, o eth carst dera Val d’Aran, dera man de Francesc Domingo, Josep Maria Cervelló, e eth madeish Antoni Freixes. Era Escòla contunharà damb excursions en territòri d’Aran e ponéncies enquiath dimèrcles 2 de juriòl pera tarde, moment en qu’aurà lòc er acte de clausura, de nau en Institut d’Estudis Aranesi – Acadèmia Aranesa dera Lengua Occitana.