Er Institut d’Estudis Aranesi – Acadèmia Aranesa dera Lengua Occitana (IEA-AALO) clausure eth cors academic

Er Institut d’Estudis Aranesi – Acadèmia Aranesa dera Lengua Occitana (IEA-AALO) clausure eth cors academic per prumèr còp ena sedença de Barcelona

Eth dijaus 18 de deseme de 2025, auec lòc er acte de clausura deth procès de dubertura dera naua sedença dera Acadèmia Aranesa dera Lengua Occitana en Barcelona, en tot coincidir damb era clausura der an academic 2025.

Era jornada comencèc damb un discors de dubertura a cargue deth president dera Acadèmia, Jèp de Montoya. En sòn parlament, Montoya a destacat eth creishement dera Acadèmia pendent eth darrèr an, eth progrès normatiu e lexicografic der aranés e eth valor estrategic que represente era naua sedença de Barcelona entà reforçar era preséncia publica dera lengua occitana. Montoya a remercat que «trabalham ena bona direccion pr’amor que cada pas entà deuant, per petit que semble, hè mès hòrt un país».

Seguidament, Jusèp Loís Sans Socasau a presentat era Memòria deth cors academic 2025, en tot explicar es projèctes mès relevants der an: des dera recèrca de microtoponimia de diuèrsi municipis dera Val d’Aran enquia era digitalizacion deth hons dera ‘Scolo deras Pireneos, atau coma era continuacion deth projècte de memòria orau e era evolucion des utís electronics coma eth Diccionari der Occitan Aranés en linha.

Joan Calsapeu aufric ua conferéncia sus era figura de Mossèn Condó, damb ua lectura istorica e literària renauida d’un autor clau entara tradicion occitana. A compdar d’aguesti contenguts, se presentèc tanben eth nau mèdia Eth Jornalet, a cargue deth sòn director Zep Armentano e deth director editoriau Ferriol Macip, que expliquèren eth projècte, es sòns objectius e eth ròtle que jògue en ecosistèma informatiu occitanocatalan.

Era jornada compdèc tanben damb era actuacion dera soprano Olga Miracle, damb dues cançons que meteren un accent simbolic a un acte pensat entà celebrar eth camin hèt e projectar es rèptes futurs.

Er acte acabèc damb ua fòto de familha e un còctel en claustre der Institut d’Estudis Catalans.