Liurament des güerdons deth Ier. Prèmi Literari Mn. Jusèp Amiell Solé
Laguens der acte de presentacion des publicacions e memòria der an 2025 der Institut d’Estudis Aranesi-Acadèmia Aranesa dera Lengua Occitana qu’auec lòc ager 27 de deseme en Hotèl Tuca de Betren se hec eth liurament des prèmis literaris Mn. Jusèp Amiell dera Fondacion AGER.
Jordi Suils, delegat de Politica Lingüistica deth Naut Pirinèu e Aran, en nòm e representacion deth Molt Aunorable President dera Generalitat Sr. Salvador Illa, Griselda Lozano, presidenta dera Fondacion AGER, Jèp de Montoya, President dera Acadèmia Aranesa dera Lengua Occitana e membres dera familia de Mn. Amiell de Garòs an hèt entrega des prèmis enes diferentes categories quedant dera següenta manera:
2A.- ACCESSIT ATH PRÈMI DE POESIA: a Julien Cabarry, damb eth pseudonim Calam
Hangassut pera sua òbra «Lo bal de las irondas». Julien ei ensenhaire, paisan que trabalhe damb abelhes, alpaques e shivaus. A un pè en audiovisuau e ena ràdio, coma presentator TV sus Oc tele; ei comedian, realizador e escritor en lengua occitana
PRÈMI DE POESIA a Gustavo Vega, damb eth pseudònim de «La Cauceta Rota», professor, poèta, artista e escrivan, doctor en Filologia Ispanica e Literatura pera Universitat de Barcelona, Licenciat en Filosofia pera Universitat de Sant Tomàs d’Aquino de Roma e pera Universitat de Barcelona. Se li concedís eth prèmi pera extraordinària e originau òbra de poesia visuau performativa, en lengua occitana.
2B.- ACCESSIT ATH PRÈMI NARRATIVA EN LENGUA OCCITANA entà Laura Gutiérrez, presentada jos eth pseudònim de Marta Rivas. Laura ei enginhèra de camins, canaus e pòrts, professora de matematiques en Institut d’Aran. Recep eth prèmi pera sua òbra de relat cuert «Mandronius, Eth guardian dera Val d’Aran»
ACCESSIT ATH PRÈMI NARRATIVA EN LENGUA OCCITANA entà Joan Calsapeu, licenciat en filologia catalana, professor de lengua e literatura catalana en ensenhament segondari, pera sua autoria dera traduccion ath catalan dera Isla des Diamants de Jusèp Condò Sambeat publicada ena editoriau Voliana Edicions. Joan ei autor de quauques òbres e a estat premiat pera sua literatura en catalan.
PRÈMI NARRATIVA EN LENGUA OCCITANA entà Antòni Nogues Biau, mètge pediatre e professor universitari pera sua traduccion ar occitan aranés des òbres mès importantes dera literatura universau. Ei traductor de Eth Quishòt, d’Anna Karenina, dera Divina Comèdia, d’Es Miserables, Era Iliada, Es fraires Karamazov, Es mil e ua nets e de mès de 50 òbres reconeishudes coma era milhor literatura internacionau. A traduït mès de 12 mil pagines e mès de 5 milions de paraules.
2C ACCESSIT ARA ACCION DE PROMOCION DERA LENGUA OCCITANA ath Cercle d’Agermanamentr Occitano catalan CAOC pes Corsi d’Occitan, qu’an ua elevada qualitat e que ja an 20 ans d’existéncia e peth Club de Lectura en occitan, dues activitats qu’ajuden a conéisher era cultura occitana en Catalonha. Eth CAOC a pròp de 50 ans d’existéncia en tot espandir era lengua e cultura occitanes
ACCESSIT ARA ACCION DE PROMOCION DERA LENGUA OCCITANA entà Christian Andreu, licenciat en periodisme pera Universitat Autonoma de Barcelona, peth sòn lideratge enes publicacions d’articles scientifics e istorics en occitan en quinsevolha des sues variantes, enes revistes digitals Sapiéncia e Medievaloc, des der an 2016. D’alavetz ença entre es dues revistes an auut mès de dus milions de visites.
PRÈMI ARA ACCION DE PROMOCION DERA LENGUA OCCITANA ara Associacion entara Difusion d’Occitània en Catalonha, associacion fondada en 2005, peth sòn trabalh entà dignificar, normalizar e hèr conéisher era lengua occitana damb ua perspectiva professionau e contemporanèa, pes moltes activitats desvolopades, especiaument peth Jornalet, quotidian occitan d’informacions que diariament mos auferís ua actualizacion des deth 2012, damb ua audiéncia annau de mès de 600.000 visites.
Cau dider qu’es prèmis an ua qualitat excepcionau autant pera sua autoria en prosa e narrativa coma pes accions de promocion dera lengua occitana autant en format papèr coma digitau.
Enorabona a toti es premiats.