Se lancen es Prèmis des Letres Mn. Amiell 2025, damb tres categories entà impulsar era creacion e era promocion der occitan
Es candidatures se poderàn presentar enquiath 10 de deseme de 2025
Era Fondacion Ager, damb eth supòrt der Institut d’Estudis Aranesi – Academia Aranesa dera Lengua Occitana e deth Departament Cultura dera Generalitat de Catalonha, a anonciat era prumèra edicion des Prèmis des Letres Mn. Amiell 2025, un nau concors que vò vier un referent dera creacion literària e dera promocion dera lengua occitana. Eth prèmi que nèish entà aunorar a Mn. Jusèp Amiell Solé (1930–2024), figura incontornabla ena defensa dera lengua e era cultura dera Val d’Aran.
Eth concors s’articule en tres modalitats, dues literàries e ua dedicada a iniciatiues de promocion lingüistica:
- Modalitat A – Narrativa e òbra literària o de divulgacion
- Dubèrta a racondes, narracions, novèlles, romans, assagi o òbres de recèrca en quinsevolh varietat dera lengua occitana.
- Modalitat B – Poesia
- Includís amassi poetics e projèctes de poesia visuau, sonora o experimentau.
- Modalitat C – Accion de promocion dera lengua
- Destinada a iniciatiues individuaus, collectives o institucionaus que trabalhen entà difóner e normalizar er occitan.
En aguesta prumèra edicion, enes modalitats literàries s’admeteràn tant òbres inedites coma òbres ja publicades, tostemp que non agen estat premiades anteriorament. Ei un critèri excepcionau d’enguan, pensat entà facilitar era participacion e visibilizar eth trabalh ja existent.
Es candidatures se poderàn presentar enquiath 10 de deseme de 2025, en format PDF ara adreça email administracion@institutestudisaranesi.cat damb er ahèr “Prèmis Mn. Amiell 2025 – [Modalitat]”. Cada autor o autora pòt presentar ua soleta òbra per modalitat, jos pseudonim.
Era jurada, formada per especialistes de prestigi en literatura e filologia occitana, garentirà era paritat e era diuersitat territoriau. Eth veredicte se publicarà en deseme, e eth liurament des prèmis se harà ena Val d’Aran pendent era dusau quinzea deth madeish mes de deseme, damb retransmission en dirècte.
Es òbres e projèctes premiadi se publicaràn e se difoneràn en bibliotèques, centres culturaus e espacis educatius.