Inauguracion dera delegacion dera Acadèmia en Barcelona
Barcelona acuelh era naua sedença dera Acadèmia Aranesa: ua hita istorica entara lengua e era cultura occitanes
Er Institut d’Estudis Aranesi – Acadèmia Aranesa dera Lengua Occitana (IEA-AALO) inaugurèc eth passat diuendres 3 d’octobre de 2025 era sua naua delegacion a Barcelona, en un acte solemne que se celebrèc ena Sala Prat de la Riba der Institut d’Estudis Catalans (IEC). Era jornada siguec ua hita istorica entara lengua e era cultura araneses, en tot consolidar per prumèr viatge era preséncia establa des dues acadèmies de lengua oficiaus en Catalonha: era catalana e era aranesa.
Just abans de començar er acte, eth president der IEA-AALO, Jèp de Montoya, siguec convidat a signar eth libre d’onor der Institut d’Estudis Catalans, acompanhat pera presidenta der IEC, Teresa Cabré, e eth conselhèr de Politica Lingüistica, Francesc Xavier Vila.
Era presidenta der IEC, Teresa Cabré, dauric er acte en tot destacar «era volontat d’enfortir encara mès uns ligams que ja son solids, frut d’ans de collaboracion e d’estima compartida pes nòstes lengües e cultures». Ath sòn torn, eth president der IEA-AALO, Jèp de Montoya, remarquèc qu’«er occitan ei part inseparabla dera diuersitat culturau de Catalonha. Aguesta sedença mos permet hèr un pas endeuant entà assegurar era sua normalizacion e garantir un futur compartit».
Er acte compdèc tanben damb es intervencions academiques de Patrici Pojada, damb era conferéncia Collaborar ath servici dera lengua occitana: un projècte entà un futur compartit, e de Ramon Sistac, damb Lengües bessoes per genetica o per aleitament?. Entre es ponéncies, eth cantautor e membre der Institut d’Estudis Occitans Eric Fraj aufric ua actuacion musicau que metec era nòta emotiva ara ceremònia damb es cançons Altas Ondas e Cavalièr.
Eth vicepresident dusau dera Deputacion de Barcelona, Dionís Guiteras, destaquèc en sòn parlament «era importanta contribucion dera lengua occitana ara diuersitat culturau deth país», mentre qu’eth conselhèr de Politica Lingüistica, Francesc Xavier Vila, clausurèc er acte en tot afirmar qu’ «er occitan ei ua riquesa entà Catalonha e, coma tau, cau cuedar-la e promòir-la en toti es encastres». Er acte finalizèc damb ua grana fòto de familha damb toti es assistents e ua copa de cava en claustre der IEC, entà celebrar aguesta etapa decisiva que garantís ua preséncia establa der occitan enes espacis academics e culturaus deth país, en tot reforçar eth pretzhèt de recèrca e normativizacion dera Acadèmia, entà ua lengua qu’ei part essenciau deth patrimòni collectiu de Catalonha.
