Bona acuelhuda des conferéncies dera Fondacion Privada Àger, en marc des Prèmis Mn. Jusèp Amiell

Era Fondacion Privada Àger organizèc eth passat 31 de juriòl, ena bibliotèca Generau de Vielha, dues conferéncies en marc des actes relacionadi damb es Prèmis Mn. Jusèp Amiell, dedicadi ara lengua, ara literatura e ara cultura occitanes.

Er acte compdèc damb era participacion de Laura Gutiérrez, accèssit deth Prèmi de Narrativa 2025, que presentèc era legenda deth gigant Mandrònius, sus era quau a escrit un relat. Era sua intervencion permetec apropar as assistents a ua des figures dera tradicion aranesa.

Era dusau conferéncia anèc a cargue de Francesc Sangar, president dera Associacion d’Amics dera Sapiéncia Occitana, que parlèc sus era situacion der ensenhament der occitan en Aran e en conjunt des territòris occitans. Eth director de Sapiéncia Occitana, Christian Andreu, auie obtengut eth prumèr accèssit ena categoria de promocion der occitan dera prumèra edicion des Prèmis Mn. Amiell, celebrada en 2025.

Es dues intervencions desvelhèren un gran interès entre es assistents e dauriren un interessant debat sus es qüestions tractades.

Er Institut d’Estudis Aranesi – Acadèmia Aranesa dera Lengua Occitana, collaborèc tanben en acte, representat per Albert Moyes, qu’intervenguec ath long dera jornada.

Ath delà des conferéncies, se presentèc eth libre que recuelh informacion e trabalhs des guanhadors e nominats des categories de poesia, narrativa e promocion dera lengua occitana dera prumèra edicion des Prèmis Mn. Amiell.

Damb aguesta iniciativa, era Fondacion Privada Àger reafirme era sua volontat de contribuïr ara promocion e ara difusion dera lengua e dera cultura occitanes, e de crear espacis de reflexion e debat ath torn dera sua transmission e valorizacion.