Eth Corpus de la Cuina Catalana incorpòre era nomenclatura des misharnons en aranés
Er Institut del Patrimòni Culinari Català a publicat era naua edicion revisada e ampliada deth Corpus de la Cuina Catalana, ua òbra de referéncia que recuelh eth patrimòni gastronomic deth país e que compde damb era participacion de reconeishudes personalitats deth mon academic e scientific.
Ua des nauetats d’aguesta edicion ei era incorporacion des nòms des misharnons en aranés. Aguesta aportacion ei frut deth trabalh des membres der Institut d’Estudis Aranesi – Acadèmia Aranesa dera Lengua Occitana (IEA-AALO), Jusèp Loís Sans e Jèp de Montoya, que collaborèren ena revision e adaptacion dera nomenclatura micologica en aranés.
En marc d’aguesta publicacion, eth catedratic de Botanica dera Universitat de Barcelona e membre dera Seccion de Sciéncies Biologiques der Institut d’Estudis Catalans, Joan Vallès Xirau, a hèt donacion d’un exemplar deth Corpus de la Cuina Catalana ara bibliotèca der IEA-AALO, contribuïnt atau a enriquir eth sòn hons bibliografic damb ua òbra de grana valor entara recèrca e era difusion deth patrimòni culinari e lingüistic.
Des der IEA-AALO volem expressar eth nòste sincèr arregraïment ath Sr. Joan Vallès per aguest generós don e peth sòn compromís damb era preservacion e era promocion deth patrimòni culturau e lingüistic.
