Er IEA-AALO e er Institut d’Estudis Occitans signen un convèni entà reforçar era cooperacion entre institucions occitanes

Vielha, 4 de juriòl de 2026. Er Institut d’Estudis Aranesi – Acadèmia Aranesa dera Lengua Occitana (IEA-AALO) e er Institut d’Estudis Occitans (IEO) an signat un convèni de collaboracion damb era volontat d’enfortir es relacions entre es dues institucions e d’impulsar accions conjuntes en favor dera lengua e dera cultura occitanes.

Eth convèni establís un marc de cooperacion permanenta que preve era representacion mutua des dues institucions enes sòns respectius encastres d’accion, er escambi de publicacions e era collaboracion ena organizacion d’actes e projèctes comuns. Atau madeish, er acòrd impulse era difusion compartida de referents dera cultura occitana mejançant publicacions e facilite era participacion institucionau entre es òrgans de govèrn de cada entitat.

Damb aguesta signatura, er IEA-AALO e er IEO reafirmen eth sòn compromís damb era cooperacion entre es principaus institucions de referéncia der espaci occitan, damb era finalitat de promòir era lengua, era recèrca e era vida culturau en conjunt deth territòri occitan.