Era Acadèmia daurís delegacion en Barcelona

Ua delegacion en Barcelona entà reforçar era preséncia der occitan en Catalonha

Entà celebrar aguesta hita istorica entara lengua occitana, er IEA-AALO a programat tres actes ena sedença der Institut d’Estudis Catalans, a on serà plaçada aguesta naua delegacion

Era dubertura d’ua naua delegacion der Institut d’Estudis Aranesi – Acadèmia Aranesa dera Lengua Occitana, en Barcelona, ei ua hita istorica entara lengua e cultura occitanes. Se tracte d’ua actuacion d’un gran impacte que vò enfortir era preséncia dera lengua occitana en Catalonha e facilitar era ampliacion dera activitat dera Acadèmia mès enlà deth territòri aranés.

Era creacion dera naua delegacion der IEA-AALO en Barcelona constituís un pas estrategic de grana transcendéncia entath futur dera lengua occitana e dera pròpria institucion. Era naua sedença serà plaçada en Carrèr Maria Aurèlia Capmany, 14-16, en barri de Ciutat Vella de Barcelona, laguens des installacions dera libreria der Institut d’Estudis Catalans, e compde damb eth supòrt dera Deputacion de Barcelona.

Enquia ara, era activitat dera Acadèmia se concentraue ena Val d’Aran, e ara, era preséncia ena capitau catalana permeterà hèr un saut qualitatiu ena sua foncion de recèrca e normativizacion, plaçant-la en un encastre mès ampli mès enlà deth territòri aranés.

Er objectiu ei qu’er aranés non se percebe sonque coma ua realitat ligada ara Val d’Aran, senon coma ua lengua que hè part dera identitat collectiva catalana e deth patrimòni europèu. 

Aguest nau espaci facilitarà era coordinacion dirècta damb es institucions nacionaus, especiaument er Institut d’Estudis Catalans e d’auti organismes academics, e daurirà era pòrta a establir ligams mès solids damb eth sector universitari e es agents culturaus dera ciutat.

Ath madeish temps, era delegacion permeterà apropar ara societat catalana eth conjunt de projèctes e activitats qu’er IEA-AALO desvolope des de hè ans: era normativizacion der aranés, era investigacion dialectologica e era documentacion deth patrimòni immateriau entre d’auti. Aguesta proximitat afavorirà ua major preséncia der occitan en sector academic, culturau e sociau, hènt-lo visible e accessible a naui publics.

Un aute des auantatges serà era interlocucion mès agila e eficaça damb eth teishit culturau e academic de Barcelona, qu’enquia ara auie d’establir contacte damb era Acadèmia sonque des de Vielha. Aguest nau scenari permeterà impulsar collaboracions, establir complicitats e plaçar era lengua occitana en un lòc de mès centralitat laguens des politiques culturaus e lingüistiques de Catalonha.

Era sedença de Barcelona serà tanben un motor de naui projèctes de recèrca e normativizacion, atau coma ua plataforma entà consolidar e ampliar es que ja son en marcha. Se tracte, en definitiva, de reforçar eth papèr der IEA-AALO coma autoritat e referent ena normativizacion der occitan en Catalonha.

Entara rèsta, era dubertura d’aguesta delegacion non ei sonque un eveniment puntuau: ei un prumèr pas que cau mantier e consolidar ath long des ans, entà garantir qu’era lengua occitana sigue cada còp mès presenta ena societat catalana. Coma lengua pròpria d’Aran, oficiau en Catalonha e cooficiau en Estat espanhòl, er aranés merite un reconeishement e ua preséncia publica qu’aguesta naua sedença contribuïrà a hèr possibles.

Activitats previstes ena delegacion

• Atencion personau e assessorament lingüistic sus er aranés.
• Coordinacion de projèctes de recèrca e normativizacion.
• Reünions institucionaus entà enfortir era preséncia dera lengua occitana en Catalonha.
• Actes dubèrti ath public coma conferéncies, presentacions e jornades academiques.

Era delegacion vò èster, ath delà, un punt de trobada entàs entitats, investigadors e professionaus interessadi ena lengua e cultura occitanes. Un espaci des d’a on impulsar era collaboracion en projèctes conjunts e bastir aliances qu’asseguren eth futur der occitan e ne refòrcen era valor sociau e culturau.

Era dubertura dera delegacion de Barcelona se desplegarà en tres cites clau

Inauguracion institucionau
Diuendres 3 d’octobre de 2025
18.30 h – Sala Prat de la Riba (IEC)

Er acte includirà parlaments institucionaus damb era participacion de Teresa Cabré, presidenta der IEC, e de Jèp de Montoya, president der IEA-AALO. Tanben i intervieràn es academics Patrici Pojada damb era conferéncia “Collaborar al servici de la lenga occitana: un projècte per un futur compartit”; e Ramon Sistac damb era conferéncia “Lengües bessoes per genetica o per aleitament?”. Er acte compdarà damb era intervencion musicau d’Eric Fraj e s’acabarà damb un aperitiu inaugurau.

Session plenària
Dissabte 4 d’octobre de 2025

Per prumèr còp, era session plenària dera Acadèmia aurà lòc en Barcelona, enes naues installacions dera delegacion, damb era reünion generau e es trobades des seccions academiques, era aranesa e era estandard.

Aguest acte ei intèrn e reservat as membres dera Acadèmia

Clauson deth 12au cors academic
Dijaus 18 de deseme de 2025
19.00 h – Sala Pere i Joan Coromines (IEC)

Era delegacion acuelherà era prumèra clausura academica der IEA-AALO celebrada en Barcelona. Er acte repassarà es projèctes e activitats deth cors, damb intervencions des membres dera Acadèmia e eth discors de clauson deth president Jèp de Montoya. Tanben compdarà damb ua actuacion musicau e un petit aperitiu.