Miquèu Segalàs, nau President dera Acadèmia
Eth Plen der Institut d’Estudis Aranesi – Acadèmia Aranesa dera Lengua Occitana (IEA-AALO), amassat dissabte, 4 de juriòl de 2026, escuelhec per unanimitat ath Sr. Miquèu Segalàs coma nau president dera institucion. Segalàs pren eth relèu de Jèp de Montoya dempús de quate ans de mandat fòrça productius qu’an representat ua etapa de creishement entara institucion.
Ath long d’aguest darrèr periòde, ara Acadèmia a impulsat diuèrsi projèctes entara lengua e cultura occitanes, entre es que destaquen eth Recuelh de Memòria Orau dera Val d’Aran, un archiu digitau damb extractes d’entrevistes a persones d’edat auançada deth país, eth Recuelh de Toponimia Menora dera Val d’Aran, entara documentacion e geolocalizacion dera microtoponimia deth territòri o eth Diccionari Occitan Aranés en linha (DOA), cridat a èster eth diccionari de referéncia dera varietat aranesa, ath delà dera continuacion dera colleccion Istòria d’Aran damb mès de 15 volums publicats e era dubertura dera delegacion dera Acadèmia en Barcelona.
Ath madeish temps, eth Plen establic era composicion era naua Equipa de Govèrn, que demore configurada dera manèra següenta:
- Ròsa Maria Salgueiro, vicepresidenta.
- Angelina Cases, secretària.
- Lourdes España, presidenta dera Seccion Aranesa.
- Claudi Balaguer, president dera Seccion Estandard.
Era naua equipa arregraïc eth trabalh desvolopat per Jèp de Montoya e se comprometec a contunhar trabalhant en favor dera defensa e normativizacion dera lengua occitana, damb esperit de servici e rigor academic, en tot promòir era recèrca, era codificacion e era projeccion sociau dera institucion.