Recuelh de Toponimia Menora dera Val d’Aran
Er 11 de mai de 2018, en Vielha se signèc un convèni entre er Institut Cartografic e Geologic de Catalonha e er Institut d’Estudis Aranesi-Acadèmia aranesa dera lengua occitana entà actualizar era toponimia aranesa. Aguest convèni auec coma resultat era publicacion deth Nomenclator dera Val d’Aran, en que se descriueren es 3450 toponims mès usuaus dera Val d’Aran.
Ara, des der IEA-AALO s’a volut hèr un pas endeuant entà determinar era toponimia dita menora o microtoponimia dera Val d’Aran, ei a díder, es nòms des, hònts, terrens, prats, zònes concrètes de montanha, etc. Estudiar es toponims aranesi ei investigar ena informacion sus eth nòste entorn, qu’a agut ua major transmission, a nivèu orau, ath long dera istòria. Era nòsta lengua escrita ei d’istòria recenta e ei ena oralitat a on trobaram era hònt deth nòste passat. Era toponimia ei un des elements fondamentaus ena identitat deth territòri, ena personalitat dera Val d’Aran. Recuelh eth conjunt de percepcions collectives en relacion damb es sues costums, damb era sua istòria, damb era cultura, damb er espaci, damb er ambient, damb eth païsatge, etc. Era lengua ei frut de tot açò, dera vida dera comunitat. Aguest recuelh mos permeterà de determinar concèptes relacionadi damb er entorn entà ua major comprension dera lengua, ampliar eth vocabulari e establir connexions lingüistiques. Ath delà, damb un plaçament espaciau e determinacion corrècta des toponims poderam estudiar mès pregondament es etimologies.
Aguest projècte s’amie a tèrme dera man der Institut Cartografic e Geologic de Catalonha, que mos a aufrit supòrt e conselh en tot moment, e que realize era edicion e maquetacion des òbres que se publicaràn. Les arregraïm enòrmament era sua disposicion e interès per accedir a trabalhar en territòri dera nòsta estimada val.